KS Besëlidhja Lezhë

Pepaj harron Skraparin: Po mendojmë për Elbasanin

2012-02-18T12:45:00.000+01:00

Duke marrë shkas nga shtyrja e kampionatit, drejtuesit e Besëlidhjes kanë menduar që fundjavën ta shfrytëzojnë për të testuar ekipin. Në të tilla kushte, sot lezhjanët do të udhëtojnë në transfertë për t’u ndeshur me Kastriotin. Miqësorja me krutanët i paraprin takimit të radhës që do të luhet në Lezhë, më 25 shkurt takimin ndaj skraparllinjtë (me rezultatin 1-2), prandaj i gjithë stafi teknik kërkon revansh. Barazimi me Himarën është konsideruar si humbje, pavarësisht se ekipi dha maksimumin në fushë. Mesfushori Vahi Pepaj, që deri në takimin me Ilirinë ka mbajtur shiritin e kapitenit, e ka ndjekur ndeshjen nga tribuna për shkak kartonësh. Gjatë një deklarate të dhënë për “Panorama Sport”, ai flet për të ardhmen e ekipit. “Besëlidhja e fazës së dytë është shumë më e fortë se ajo që mbylli fazën e parë. Kjo si rezultat i fluksit të bollshëm që vërshoi nga merkatoja dimërore. Fitoren me Skraparin as që e diskutojmë. Ne tashmë po mendojmë për trepikëshin e transfertës në Elbasan, kjo jo për ambicie, por nga realiteti që mbizotëron aktualisht në skuadër. Edhe pse fazën e parë e mbyllëm në vend të katërt, pozitë jo e favorshme për një skuadër pretendente, ne jemi optimistë, pasi skuadrat rivale nuk kanë ndonjë diferencë të dukshme. Duke përjashtuar këtu Luftëtarin që ka krijuar hendek, ndonëse jo të pakapërcyeshëm. Besëlidhja ka krijuar një ekip superioreje, ndaj në 14 javë që kanë mbetur ne mund t’ia dalim duke i parakaluar”, – përfundon prononcimin mesfushori, Vahi Pepaj.

Burimi: Panorama Sport

Besëlidhja, të shtunën miqësore me Kastriotin

2012-02-16T15:54:00.001+01:00

Faza e dytë, përveçse po konsolidon bindjen e kampit lezhjan, përfshi dhe ultrasit, edhe po i kënaq këta të fundit me lojën në kuadër të stërvitjes së përditshme. Kjo, për arsye se dhe stoli tani përbëhet nga më shumë se gjysma e formacionit bazë që ka luajtur fazën e parë. Duke marrë shkas nga shtyrja e kampionatit, drejtuesit e Besëlidhjes kanë planifikuar një miqësore me Kastriotin të shtunën në Krujë, në orën 14:00. Numri një i pankinës lezhjane, Ritvan Kulli, për fazën e dytë ka në dispozicion shumë futbollistë cilësorë, që bëjnë diferencën me çdo ekip, ndaj është i qetë për sa u përket mungesave të mundshme nga dëmtimet. Bukurinë e ndeshjeve të kontrollit brenda grupit në këtë fillim faze po e nxjerr në pah konkurrenca për të luajtur në formacionin bazë. Kryetekniku i ekipit lezhjan është i bindur se Besëlidhja e fazës së dytë është e aftë që të bëjë diferencën, pavarësisht barazimit pa gola që mbylli javën e parë në transfertë. “Sfida ndaj Himarës ishte vlerësuar maksimalisht, për vetë faktin se kjo e fundit lufton për mbijetesë dhe për më tepër luante në shtëpi. Loja e ekipit më kënaqi, pavarësisht rezultatit, pra skema e re funksionoi”.

Burimi: Panorama Sport

Besëlidhja pezullon serbin, Stojkoviç drejt largimit

2012-02-15T09:44:00.002+01:00

Në prag të ndeshjes që Besëlidhja luajti në Himarë, ka lindur një konflikt mes qendërmbrojtësit serb Aleksandër Stojkoviç dhe trajnerit Ritvan Kulli. Gjatë sfidës së kontrollit që po luhej në stadiumin “Besëlidhja”, qendërmbrojtësi, pas një ndërhyrjeje të gabuar ndaj sulmuesit Dibra, është qortuar nga tekniku Kulli. Mirëpo mbas një replike, gjithçka ka përfunduar me nxjerrjen nga loja të Stojkoviçit prej kreut të pankinës. Pas këtij incidenti, teksa serbi largohej nga fusha, ai është thirrur nga presidenti Gjokë Noka, që po e ndiqte nga afër seancën stërvitore. Por, siç duket, edhe këtu dialogu është zhvilluar i ashpër. Megjithatë, të gjithë menduan se ishte thjesht një ngjarje e momentit dhe se nuk do të kishte pasoja. Mirëpo Stojkoviç nuk u grumbullua për transfertën e Himarës. Madje, tani gjërat janë bërë vërtet serioze. Drejtuesit e klubit kanë marrë edhe masat respektive.

Dënimi - Lidhur me vendimin që klubi ka marrë për të dënuar mbrojtësin serb, vetë presidenti Noka ka zbardhur gjithçka: “Nuk është hera e parë që Stojkoviç kundërshton trajnerin, apo edhe pjesëtarët e tjerë të stafit teknik. Pas ndërhyrjes së rëndë që qendërmbrojtësi Stojkoviç i shkaktoi sulmuesit Dibra, trajneri e qortoi me të drejtë dhe e nxori nga fusha. Mirëpo në vend që të kërkonte të falur, ai debatoi ashpër me teknikun. Kur serbi la fushën e stërvitjes, unë e thirra për të sqaruar situatën, por edhe me mua replikoi ashpër. Në analizën që zhvilluam në prag të nisjes drejt Himarës, unë së bashku me stafin teknik dhe me një shkresë për dijeni FSHF-së morëm këto masa disiplinore ndaj Aleksandër Stojkoviç: përjashtohet nga stërvitja për tri javë rresht dhe dërgohet të përgatitet me U-19-ën, dy rroga mujore gjobë dhe në rast përsëritjeje do të largohet përgjithmonë nga Besëlidhja. Në adresë të Stojkoviçit nuk është hera e parë që kam ankesa, si nga stafi teknik dhe nga kolegët e tij, përfshi edhe bashkëkombësit e tij”, ka përfunduar presidenti Noka.

Burimi: Panorama Sport

2012-01-15T17:24:00.001+01:00

Ardian Beqiri është goditja e dytë që bëjnë drejtuesit e Besëlidhjes, pas afrimit të një ditë më parë të Albert Kaçit. Mesfushori, i cili fazën e parë ka qenë pjesë e Kamzës, ka arritur akordin me lezhjanët. Numri një i presidencës lezhjane, Gjok Noka, po e mban fjalën duke sjellë në ekip prurje cilësore. Ndërkaq mesfushori, i cili u zyrtarizua një ditë më parë te Besëlidhja, Albert Kaçi, në një prononcim për “Panorama Sport” u shpreh: “E pranova me kënaqësi ofertën për të veshur fanellën e Besëlidhjes.

Lezhjanët jo rastësisht e mbyllën fazën e parë në vend të katërt, një pozicion jo shumë i kënaqshëm si shkallë renditjeje, por duke pasur parasysh se jemi me pikë të barabarta me Lushnjën e vendit të tretë dhe veç një pikë larg Kukësit të vendit të dytë, i kemi të gjitha mundësitë që të rikuperojmë në fazën e dytë. Këtu në Lezhë, që ditën e parë kam gjetur një atmosferë të ngrohtë dhe miqësore, ndërkohë që edhe kushtet janë të kënaqshme. Marrëdhëniet me stafin drejtues i kam shumë të mira dhe besoj se për ditë dhe më shumë do të forcohen. Besëlidhja si pretendente kryesore për në Superiore, fazën e dytë do të grumbullojë më shumë pikë se në të parën.

Kështu që duhen eliminuar në maksimum gabimet e vërejtura gjatë ndeshjeve të fazës së parë, por dhe përforcimin e atyre pikave, ku kanë çaluar më shumë gjatë kësaj faze, me elementët cilësorë që po sjellin në Lezhë. Jam i bindur se Besëlidhja kampionatin e ardhshëm do të jetë pjesë e Superiores, jo se do të jem unë ai që do të bëjë mrekullinë, por kjo do të vijë nga loja dhe potenciali taktik e teknik që Besëlidhja ka në organikë”, – ka përfunduar mesfushori shkodran i ardhur ditët e fundit te Besëlidhja.

Stërvitja - Besëlidhja si një nga pretendentet kryesore për t’u ngjitur në Kategorinë Superiore po vijon stërvitjet me ngarkesë të plotë në fushën e stadiumit “Besëlidhja”, nën drejtimin e trajnerit Ritvan Kulli. Ndërkohë që nesër drejtuesit e lezhjanë kanë planifikuar një ndeshje kontrolli me rezervat dhe prurjet e mundshme, gjatë së cilës shpresohet që ata të jenë të gatshëm.

Burimi: Panorama Sport

Kaçi shkëlqen në miqësore, më pas firmos

2012-01-13T19:04:00.001+01:00

Besëlidhja ka zyrtarizuar dje prurjen e parë të merkatos. Bëhet fjalë për mesfushorin Albert Kaçi, i cili menjëherë pas përfundimit të takimit miqësor, loja e të cilit spikati, ka nënshkruar kontratë me klubin lezhjan. Drejtuesit e Besëlidhjes të kryesuar nga presidenti Gjok Noka deri më tani kanë menduar për forcimin e mesfushës, sektor ky që gjatë gjithë fazës së parë ka çaluar. Ndaj besohet se shkodrani Albert Kaçi këtë detyrë do ta kryejë më së miri. Premtimi i presidentit Noka për të sjellë në Lezhë futbollistë cilësorë, ka filluar që të konkretizohet me nënshkrimin e kontratës me mesfushorin shkodran, por sipas tij pritet që javën e ardhshme të ketë prurje të tjera cilësore. Lezhjanët janë përballur dje në një test me ekipin që është në formim e sipër, Shëngjinin, të cilën e kanë fituar me rezultatin 3-0. Golat u shënuan në pjesën e dytë nga Albert Kaçi, Ilir Ndoj dhe mbrojtësi, Mirsad Gruda.

Burmi: Panorama Sport

Merkato: Mesfushori Albert Kaçi mund të jetë përforcimi i parë

2012-01-11T14:44:00.001+01:00

Në stërvitjen e Besëlidhjes ka qenë sot edhe mesfushori shkodran, Albert Kaçi. Shkodrani i mesfushës ka rënë parimisht dakort me drejtuesit e klubit dhe pritet që të nëshkruajë për fazën e dytë, për të ndihmuar skuadrën lezhjane. Edhe pse akoma nuk është zyrtarizur afrimi i tij në skuadër, mesfushori Kaçi mund të jetë edhe përforcimi i parë për Besëlidhjen në këtë merkato dimri. /ksbeselidhja

Besëlidhja, sytë nga të rinjtë

2012-01-11T14:31:00.002+01:00

Mbipopullim futbollistësh ka patur edhe stërvitja e kësaj të marte në kampin lezhjan. Përpos të konfirmuarve, një numër i madh futbollistësh të të rinj u është dhënë rasti, për t’u provuar këtë fillim faze pranë ekipit të Besëlidhjes. Stafi menaxherial dhe teknik, përpara se të futet në merkaton dimërore ka afruar pranë klubit futbollistë që mund të japin kontribut tek ekipi i të rriturve. Kjo ka bërë që edhe “dyndja” të mos vonojë, duke e populluar stërvitjen me një numër të konsiderueshëm lojtarësh. Lezhjani Mirsad Gruda e sheh me optimizëm këtë afrim të talentëve lezhjanë.

“Është një eksperiencë pozitive, sepse përpos se afron të rinj, ul edhe koston e klubit. Por më shumë se kaq, unë do ta vlerësoja këtë sipërmarrje edhe për ta pasuruar grupin me sa më shumë lezhjanë. Ajo që vihet re gjatë këtyre viteve është një “mani” për të marrë futbollistë nga rrethet e tjera. Jo se nuk jam dakort me këtë, por mendoj se kjo duhet të bëhet për futbollistë që kualiteti i i tyre të jetë dukshëm më i mirë, se i lojtarëve vendas. E them edhe njëherë, jo se jam lokalist, por nuk është korrekte, që klubi investon me kuadro dhe ambiente për këta futbollistë dhe ata t’i shërbejnë një klubi tjetër me parametra zero, pra duke mos paguar asnjë vlerë monetare.

Ndoshta përzgjedhjet e grupit tonë janë bërë të studiuara, por do të isha shumë dakort që edhe këtyre të rinjve t’u japin një mundësi. Gjithsesi, këto janë politika të klubit, që ndoshta mund t’u kushtojë edhe pak më shumë kujdes këtij menaxhimi, duke i huazuar ose edhe duke furnizuar ekipin e ri që po ngrihet në Shëngjin. Përsa i përket ekipit tonë, mendoj se edhe pse jemi në vendin e katërt, kjo nuk është ndonjë “gjëmë” e madhe, sepse kampionati është në gjysmë të tij dhe ne i kemi të gjitha mundësitë për të rikuperuar pozicionin dhe më tepër këtë rikuperim e shikoj në takimet direkte, që kemi me ekipet rivale.

Dhe duke ditur që kushtet e ekipeve rivale janë të mira, atëhere kjo na avantazhon që të tregojmë vlerat tona, qofshin këto takime edhe në transferta. Kemi filluar stërvitjen dhe çdo gjë është brenda parametrave të parashikuara. Kemi deri tani vetëm dy largime të konfirmuara, por edhe një grup të madh futbollistësh nga ekipet e tjera që na janë vetëofruar. Tani është puna e stafit teknik, për të përzgjedhur ata që do t’i duhen grupit. Por duke parë ecurinë e fazës së parë, ajo që i mungon grupit është vetëm përforcimi në repartin e sulmit, çka e tregon më së miri edhe numri i pakët i golave të shënuar.

Mendoj se ruajtja e unitetit brenda grupit është faktori i parë që duhet të jetë i pacënuar, sepse ka qenë ky unitet që na ka bërë të tillë, për të marrë këto rezultate të deritanishme edhe pse nuk janë fort të pëlqyeshme nga stafi dhe tifozeria jonë”, përfundon mbrojtësi 26-vjeçar, që për fazën e parë ka bërë rolin e futbollistit “xhol”, duke luajtur në të gjitha pozicionet e linjës së majtë.

Burimi: Sport Ekspres

2011-12-29T21:48:00.001+01:00

Galeri fotografike me momentet e ndeshjes së javës së 15 të kategorisë së parë, Vlora - Besëlidhja të luajtur në stadiumin "Flamurtari" me 28 dhjetor 2011. Ndeshja përfundoi me rezultatin e bardhë 0:0 ku ekipi jonë nuk arriti të marrë më shumë se një pikë në trasfertën e Vlorës.

Java 15: Vlora - Besëlidhja 0:0. Nuk ka fitues në Vlorë

2011-12-29T19:17:00.000+01:00

Vlora dhe Besëlidhja kanë barazuar pa gola në stadiumin “Luftëtari”, në ndeshjen e fundit të vitit dhe të fazës së parë. Një ndeshje që ka pasur më shumë emocione gjatë pjesës së dytë, kur të dy ekipet e kanë kërkuar me ngulm golin dhe i janë afruar ndjeshëm, por nuk kanë mundur ta shënojnë atë. Ndeshja nis e qetë, pa raste të rrezikshme në portat respektive, pasi loja përqendrohet në mesfushë, madje ka edhe shumë ndërhyrje të rënda, që e detyrojnë gjyqtarin Jorgji të nxjerrë kartonë të verdhë. Sinjalin e parë e jep Serjani, i cili godet brenda zonës, por topi largohet nga një mbrojtës mik. Vlora luan më mirë pjesën e parë, por pa pasur rrezikshmëri para portës kundërshtare.

Besëlidhja bazohet te serbi Miçiç, por ai nuk ka mundësi ta kërcënojë seriozisht portën vlonjate. Besëlidhja duket një ekip pa shumë kurajë, por herë pas here kundërsulmon, por pa efikasitet. Pjesa e parë mbyllet në barazim, ndërkohë që 45 minutat e dyta janë më të mira. Besëlidhja dhe Vlora kanë mundësi për të shënuar, por nuk i shfrytëzojnë rastet që u paraqiten.

Vlora mbetet me 10 vetë, pasi Kaçani merr kartonin e dytë të verdhë. Besëlidhja ka mundësinë më të mirë për të kaluar në avantazh, ku Miçiç del përballë portierit Hysi dhe nuk arrin të shënojë, pavarësisht se ka tentuar dy herë. Edhe Vlora ka një rast të artë me Skënderajn afër fundit të të ndeshjes, por në çastin e fundit topi i goditur prej tij devijohet nga Stojkoviç.

Besëlidhja luan më mirë, pasi ka edhe superioritet numerik, ndërsa Vlora i beson kundërsulmit dhe mund t’i kishte ndëshkuar miqtë, nëse do t’i shfrytëzonte si duhet rastet që krijoi. Nuk ka gol dhe gjithçka mbyllet në barazim.

Vlora - Besëlidhja 0-0
Vlora: Hysi, Bisha, Myderizi, Kaçani, Hoxha (Cërova 78’), Strati (Prifti 74’), Çaushaj, Serjani, Shabani (Dalipaj 72’) ,Skënderaj.
Trajner: A.Haxhiaj.
Besëlidhja: Xhika, Shuti, Peqini, Stojkovic, K.Dibra, Gruda, Jaçaj, Pepaj, Malasi, A.Dibra (Mehja 65’), Miçiç. Trajner: R.Kulli.
Gjyqtarë: E.Jorgji, R.Preça, E.Gançi (Elbasan)
Kartonë të verdhë: Myderizi, Kaçani, Peqini, K.Dibra, A.Dibra
Karton i kuq: Kaçani

Burimi: Sporti Shqiptar

Lezhjanët në kor: Kukësi nuk është konkurrenti ynë

2011-12-23T20:55:00.001+01:00

Pasi kanë hedhur pasë krahëve dëshpërimin e një humbjeje, sikur ishte ajo e transfertës së Kukësit, lezhianët i janë përveshur punës, për pregatitjen e takimit të radhës, atë me fqinjët e Mamurrasit. Në këtë takim, lezhianët do të kenë mungesat e kapitenit Peqini, i cili është i penalizuar nga një karton i kuq, si dhe të fantazistit Jacaj. Për këto mungesa, stafi lezhianë është i pashqetësuar, pasi veç faktit që grupi i lojtarëve është i dubluar, në mënyrën më të mirë të mundëshme, por ky takim luhet përpara tifozerisë vëndase, që është një tjetër avantazh.

Edhe njëri nga futbollistët e shquar të repartit difensiv, në mbrojtjen e Besëlidhjes, shkodrani Bruno Kepi, e ka përjetuar i shqetësuar padrjetësinë e humbjes në Kukës, por kërkon që të ruhet atmosfera optimiste brënda grupit. “Mendoj se atë humbje duhet ta hedhim mbrapa dhe le të merren organet kompetente me vendosjen e drejtësisë. Edhe pse kemi humbur një pozicion në renditje, ekipi i ka forcat për të reaguar dhe për t’u rikthyer në krye të tabelës. Ndërsa pësa i përket Kukësit, vërtetë na i mori tre pikët, por nuk besoj se do t’i nevojiten shumë, pasi nuk besoj se e kanë seriozisht, për të pretenduar ngjitjen në Kategorinë Superiore.

Që këtë javë do të jemi sipër tyre, por kjo nuk ka shumë rëndësi, se ne garën nuk e kemi me Kukësin, por me Luftëtarin, Besën, apo Lushnjën. Dy ndeshjet e fundit do të jenë si finale dhe ne do të marrim maksimalen e pikëve, për të bërë edhe njëfarë autokritike. Gjithçka na favorizonë edhe pse ne do t'ja bëjmë shërbimet, sikur të ishte një ndeshje finale”, përfundon mbrojtësi i djathtë i ekipit të Beslidhjes, Bruno Kepi, i cili gjatë takimit të fundit ka zëvendësuar kapitenin Peqini, në rolin e qëndërmbrojtësit, detyrë që do ta ketë edhe në dy takimet e fundit të vitit.

Burimi: Sport Ekspres

K.S. Besëlidhja Lezhë ndër vite - Foto

2011-12-22T19:32:00.001+01:00

Një galeri fotografike e ekipit Besëlidhja ndër vite, me uniforma të ndryshme, nga ato verdhekuq që janë edhe ngjyrat historike të klubit e deri tek uniformat blu të viteve të fundit. Fotoja më domethënëse është fotoja e parë që është bërë në vitin 2000, atëherë kur Besëlidhja dilte kampione e kategorisë së parë, në finalen e luajtur në "Qemal Stafa" ndaj ekipit të Besës.

Kulli: Jam i shqetësuar, por po mendoj për të premten

2011-12-22T12:05:00.003+01:00

Ka vazhduar normalisht stërvitja në kampin lezhian. Humbja në transfertën e Kukësit edhe pse është konsideruar si e pashmangshme, përsëri ka krijuar një gjendje “shoku” në radhët e futbollistëve. Stafi lezhian është treguar tejet i vëmendshëm, duke i mbajtur larg futbollistët nga kjo situatë aspak e favorshme. Madje edhe prononcimi mediatik ka qenë i kujdesshëm. Jo pak “i ftohtë” ka qenë edhe tekniku Ridvan Kulli, duke dhënë shembullin e një profesionisti të vërtetë. Tekniku do të tregohej i kujdesshëm për gazetën, duke u shprehur: “Normalisht jam i shqetësuar, si gjithë ambjenti futbolldashës këtu në Lezhë.

Jo se nuk pranoj humbjen, se ajo është pjesë e garës dhe ne që kemi eksperiencë të gjatë, i suportojmë më me lehtësi këto situata. E kishim përgatitur takimin edhe taktikisht, por edhe psikologjikisht, duke parashikuar brenda edhe ndonjë acarim të mundshëm. Me këtë dua të them, se ka qenë një ndeshje e ngarkuar dhe tejet specifike, si për pozicionin në renditje edhe për gjendjen emocionale të ekipeve. Nuk bashkohem me vendimin e dhënies së penalltisë, si dhe ndëshkimin me karton të kuq të futbollistit tonë kryesor, kapitenit të skuadrës Peqini.

Goditja ka qenë e dyfishtë, si duke e lënë ekipin, për afro 55 minuta me një futbollist më pak, por edhe duke ndëshkuar kapitenin, që konsiderohet si negociatori i gjyqtarit me ekipin. Përsa i përket takimit, duke u goditur dyfish jemi munduar të reagojmë edhe pse futbollistët kanë qenë tejet të acaruar dhe nuk kanë mundur të ruajnë gjakftohtësinë. Gjithsesi, edhe pse ndikimi i këtyre situatave është i pashmangëshëm, unë u bëj thirrje futbollistëve të mij, tifozerisë tonë të mrekulluehme, që ka mbajtur një qëndrim tejet të duruar në Kukës, se Besëlidhja nuk është një ekip rastësor, që e mbështet suksesin tek një takim, por një ekip i strukturuar profesionalisht dhe sukseset janë çështje kohe.

Po punojmë që të përgatitemi për takimin e radhës, duke i dhënë rëndësinë e duhur. Përsa i përket apelimit të këtij takimi, me këtë merret stafi drejtues dhe besoj se duke vëzhguar filmimet, drejtësia do të na japë të drejtë”, do të përfundonte trajneri Kulli, i cili ka dashur që t’i mbajë sa më larg futbollistët nga prononcimet mediatike. Në javën e parafundit, lezhianët do të presin një tjetër ekip fqinj, sikurse është ai i Mamurrasit.

Burimi: Sport Ekspres

Presidenca kuksiane: Akuzat e Nokës, dëshpëruese dhe të pabaza!

2011-12-20T18:52:00.002+01:00

Drejtuesit kuksianë sqarojnë se në ndeshja me Besëlidhjen ishte mjaft korrekte dhe nuk pati dhunë Presidenca, drejtuesit e klubit dhe stafi teknik kuksian i kanë cilësuar të pavërteta, të pabazuara në fakte, emocionale dhe dëshpëruese nga humbja akuzat e presidentit të Besëlidhjes, Gjokë Noka, për trukim të ndeshjes Kukësi-Besëlidhja. Ata hedhin poshtë gjithashtu akuzat e presidentit Noka për dhunë ndaj ekipit lezhjan, që, sipas tij, është ushtruar nga zyrtarë vendorë, madje edhe deputetë.

Këto akuza të presidentit lezhjan, sipas drejtuesve të Kukësit, nuk e zbehin aspak fitoren bindëse të së shtunës. ”Nuk kishte si të ndodhte ndryshe. Kjo ishte fitoja e 5-të radhazi. Ndeshjen me Besëlidhjen tifozët kuksianë kishin kohë që e prisnin dhe ne ishim përgatitur dhe motivuar për fitore, që për fat e arritëm. Humbja mund të jetë dëshpëruese për lezhjanët, pasi ata kanë zbritur nga vendi i dytë, por kështu e ka futbolli. Por dëshpërimi nga humbja nuk duhet të kalojë në akuza dhe shpifje.”

Ky është qëndrimi i presidencës kolegjiale të Kukësit, e kryesuar nga Ramë Geci. Për gjykimin, drejtori teknik i Kukësit, Sabri Balla, sqaron se treshja që gjykoi ishte e treta, pasi lezhjanët kishin refuzuar dy palë gjyqtarë të caktuar nga FSHF-ja. Megjithatë, sipas tij, gjykimi ka qenë korrekt dhe për këtë janë në dispozicion pamje filmike.

Po ashtu, ai pohon se korrekt ka qenë edhe veprimi i tifozëve të dy ekipeve dhe punonjësve të policisë, që kishin marrë masa për të mos ndodhur asnjë incident. “Akuza të tilla nuk i zbehin aspak rezultatet e Kukësit dhe ne tani mendojmë për kryendeshjen e javës tjetër në Gjirokastër, me Luftëtarin kryesues,” – u shpreh Balla.

Burimi: Sporti Shqiptar

Anësori, kunati i lojtarit të Kukësit dhe komshi me trajnerin!

2011-12-18T18:24:00.001+01:00

Tepër i nervozuar ka qenë pas ndeshjes, presidenti i Besëlidhjes, Noka: “Fillimisht kam patur vetëm dyshime që penalltia e akorduar kundër nesh, shoqëruar me karton të kuq nuk qëndronte në asnjërin nga vendimet: së pari, veprimi është kryer jashtë zonës sonë dhe së dyti, prekja e topit me dorë ka qenë krejt e pavullnetshme. Them fillimisht, pasi tani nuk kam asnjë dyshim për dyshimin e shfaqur. Dhe a e dini pse? Jo se pashë moviolën e rastit, por se u njoha me një “moviolë” tjetër: Anësori i ndeshjes së sotme është kunati i futbollistit Berberi të Kukësit. Edhe tjetra: dera e apartëmentit të tij në Tiranë është ballë për ballë me atë të Shahin Berberit, trajnerit të Kukësit. Nuk e di se si mund ta justifikojnë në Federatë përzgjedhjen e këtij gjyqtari, por unë jam i vendosur t’i shkoj deri në fund kësaj historie.

Burimi: Sport Ekspres

Java 13: Kukësi - Besëlidhja 2:0. Arbitri i dhuron fitoren kuksianëve

2011-12-17T15:00:00.000+01:00

2011-12-11T15:25:00.001+01:00

Edhe pse nuk ka qenë në kohën më të mirë, përsëri lezhianët janë solidarizuar me protestën e Shoqatës Kombëtare të Gjyqtarëve, jo vetëm duke zbatuar vendimet, por u japin atyre edhe një mbështetje morale. Nëse bojkotimi i gjyqtarëve ka si subjekt luftimin e dhunës kundër "xhaketave të zeza", për lezhianët kjo dhunë fizike dhe psikologjike ka qenë “bashkëvuajtëse” edhe tek ekipi i Besëlidhjes, sidomos në sezonin e kaluar, në takimet që ekipi ka luajtur në transferta. Ndoshta mund të jetë ndër ekipet që është penalizuar më shumë, si nga gjyqtarët e “detyruar”, ashtu edhe nga presioni vendas.

Pse jo, kjo ka ndikuar deri në mosarritjen e objektivit në edicionin e shkuar. Gjithsesi, njëzëri në unison, stafi i Besëlidhjes dëshiron, që ngjarje të tilla të jenë të fundit dhe të mos përsëriten më. Por atmosfera në kampin e “ultrasve” është ndezur paksa edhe nga prononcimet verbale të protagonistëve të ekipit të Kukësit, megjithëse në përgjithësi po mbahet një qëndrim qytetar, nga të dyja tifozeritë. Megjithatë, sipas lezhjanëve, vendasit duhet t’i gëzohen edhe këtë javë renditjes, kaq pranë në pikë me Besëlidhjen, sepse nuk do ta kenë më këtë shans. Por në këtë kryesfidë, lezhjanët do të kenë përballë edhe tre futbollistët e mirënjohur të Kukësit, sikurse janë lezhianët Kreshnik Ivanaj, Andi Koçi, por edhe Picolin (Klaudio Pjetrushi) e famshëm, që edhe pse nuk është federuar, është një kuksian “rrace”, ndoshta edhe nga pakënaqësitë që ka patur nga ekipi i origjinës.

Jo pak të forta kanë qenë edhe prononcimet, si mediatike, por edhe ato në ambientet publike të Lezhës, të këtyre futbollistëve, teksa do të kërkojnë “shpagim”, duke bërë një paraqitje të pakompromis profesionistësh. “Kreshniku” (Ivanaj) lezhjan i Kukësit do të tregohej më diplomat, teksa do ta zbuste situatën, duke u shprehur se: “Padyshim, ne kemi një pjesë Besëlidhje në qënien tonë, sepse jemi produkt i këtij ekipi dhe këtij qyteteti, por kjo nuk do të thotë, që pjesa sentimentale të mposht atë profesionale. Kemi respekt për arritjet e Besëlidhjes dhe këto na kënaqin edhe ne edhe pse nuk jemi pjesë e ekipit. Na kënaqin si ish-pjestarë të ekipit, si qytetetarë të këtij qyteti, pse jo edhe si malësorë. Por ne jemi profesionistë dhe për këtë paguhemi, që të bëjmë më të mirën për kontratën që kemi nënshkruar. Do të dëshiroja që tre pikët t’i fitonte më i miri.

Dëshira do të ishte që t’i fitonin të dy ekipet, por kjo nuk mund të ndodhë, prandaj le të fitojë ai që do ta meritojë dhe ne për këtë jemi të “mbrojtur” nga të dyja anët. Kushdo që të fitojë do të na “hidhërojë”, vetëm publiku dhe futbolli të jetë i gëzuar”, do të përfundonte një lezhjan i Kukësit.Ndërkohë, stërvitja ka vazhduar normalisht në kampin lezhjan dhe do të duhen edhe tetë ditë pritjeje, për të “shijuar” atë që Besëlidhjes i ka ardhur më pranë se asnjëherë tjetër për këtë fazë. Arritjen e vendit të parë, duke u ndihmuar edhe nga kalendari.

Burimi: Sport Ekspres

Policia "i ve drynin" stadiumeve: Nuk plotësojnë kushtet e sigurisë

2011-12-10T20:23:00.001+01:00

Drejtori i Përgjithshëm i Policisë së Shtetit, Hysni Burgaj, ka tërhequr vëmendjen e opinionit sportiv me anë të një letre drejtuar FSHF-së, si dhe administratorëve të 28 stadiumeve, të konsideruar si jashtë standardeve për sigurinë. Sipas z.Burgaj, Policia e Shtetit nuk do të mbajë përgjegjësi për dhunën që do të ushtrohet, nëse do të ndodhë në një pjesë të konsiderueshme të stadiumeve në vendin tonë të cilat nuk janë të sigurta për lojtarët dhe zyrtarët e klubeve. Sipas Policisë, kjo vjen më së shumti nga neglizhenca totale e administratorëve të këtyre stadiumeve, ku më së shumti theksi vihet te bashkitë e komunat që i kanë në administrim.

Duke marrë shkas edhe nga ngjarja e shëmtuar që ndodhi pas ndeshjes Laçi-Kastrioti, Policia e Shtetit ka bërë një hap konkret, duke mbyllur në këtë mënyrë plot 28 impiante në të gjithë Shqipërinë, teksa 4 prej tyre u përkasin klubeve të Superiores. “Edhe më parë kemi pasur komunikim shkresor me institucionin tuaj lidhur me problematikën e kushteve teknike të stadiumeve, por masat e marra janë minimale dhe situata vijon të jetë e njëjtë. Duke iu referuar informacioneve të ardhura nga drejtoritë e policisë në qarqe, rezulton se në shumë terrene sportive nuk janë zbatuar detyrimet përkatëse", thuhet ne shkresen e Policise se Shtetit.

Miqësore: Vllaznia - Besëlidhja 2:1

2011-12-10T14:31:00.001+01:00

Ndërprerja e kampionatit për shkak të bojkotit të gjyqtarëve, i ka vënë menjëherë në lëvizje drejtuesit e Besëlidhjes. Për të mos e lënë pushim këtë ditë, ata menjëherë kanë planifikuar zhvillimin e një ndeshje miqësore. Përballë tyre ka qenë ekipi i Vllaznisë dhe ndeshja është zhvilluar sot në orën 11.00 në fushën sportive "Reshit Rusi". Mes këtyre skuadrave ka patur edhe një tjetër përballje miqësore pak kohë më parë kur kampionati u pat ndërprerë sërish, atëherë për shkak të ndeshjeve të kombëtares. Miqësorja e kësaj here do t'i shërbejë edhe njëherë tjetër trajnerëve Vata e Kulli për të parë gjendjet e skuadrave të tyre në prag të sfidave të rradhës që ato kanë me Dinamon dhe Kukësin.

Eshtë sulmuesit Jurgen Gjini që shënon golin e parë të ndeshjes në minutën e 29-të pas një krosi të bukur të Hajdarit nga e majta. Katër minuta më vonë, do jetë mesfushori 18 vjeçar Bekim Dema që me të majtën e tij do shënonte një gol shumë të bukur me një goditje të saktë nga jashtë zone duke dyfishuar rezultatin. Pas këtyre dy golave të Vllaznisë, vjen edhe goli i Besëlidhjes me anë të sulmuesit shkodran Arenc Dibra që shënon në minutën e 38-të një gol shumë të bukur. Pjesa e parë e ndeshjes mbyllet 2-1 por edhe në pjesën e dytë nuk do ketë më asnjë gol tjetër. /ksbeselidhja.com

Kuksianët: Besëlidhja ta harrojë “arratisjen”!

2011-12-09T12:16:00.001+01:00

Trajneri Berberi e konsideron thjesht ndeshje të radhës, ndërsa lezhjani Pjetrushi parashikon fitore me gol të Ivanajt. Kukësi, rivali më i afërt i Besëlidhjes, e pret me mjaft optimizëm e shpresë ndeshjen me lezhjanët. Futbollistët kuksianë kanë shumë besim për suksesin e radhës dhe u thonë lezhjanëve ta harrojnë “arratisjen”, pasi duhet kaluar “kloni”, që është në Kukës. Pas fitores me Skraparin në transfertë, Kukësi po përgatitet për ndeshjen më të rëndësishme para tifozëve të tij, atë me Besëlidhjen rivale. Kontigjenti prej 22 futbollistësh e ka nisur punën në Tiranë, ndërkohë që të mërkurën është grumbulluar në Kukës.

Trajneri Berberi - Trajneri Shahin Berberi thekson për “Sportin shqiptar” se Besëlidhja është thjesht një ndeshje e radhës: ”Betejat tona kanë filluar që në fazën përgatitore. Nuk merremi me Besëlidhjen. Ne kemi punën tone dhe lezhjanët i konsiderojmë si çdo ekip tjetër. E kam deklaruar gjithmonë se në asnjë moment nuk duhet të vetëkënaqemi,” – deklaron kreu i stolit kuksian, i cili, duke folur më tej për rivalët, thekson:

“Rivalët tanë i kanë fituar ndeshjet brenda me 4-5 penallti, ndërsa Kukësi ka fituar deri tani vetëm një të tillë në fushë kundërshtare. Megjithatë, secili meriton vendin që ka. Cilësia e skuadrës sonë është ngritur nga dita në ditë. Kukësi zhvillon lojë kolektive, pavarësisht se golat po i shënon Ivanaj.”

Pjetrushi - Për ndeshjen me Besëlidhjen flet edhe lezhjani Klaudio Pjetrushi, i cili po stërvitet me ekipin kuksian, në pritje të federimit në janar, pas aventurës italiane. ”Kukësi fiton me Besëlidhjen, me gol të shënuar nga Kreshnik Ivanaj,” – parashikon futbollisti lezhjan, Pjetrushi.

Burimi: Sporti Shqiptar

Shtyhet java 13. Arbitrat bojkotojne te gjitha kampionatet

2011-12-08T17:24:00.001+01:00

Shoqata e Bashkimit të Arbitrave të Futbollit Shqiptar në një mbledhje të saj ka marrë vendim për të bojkotuar të gjitha aktivitetet futbollistike të fundjavës. Të indinjuar nga dhuna e ushtruar në Laç ndaj kolegut të tyre Lorenc Jemini dhe në gjendje jo të mirë psikologjike “xhaketat e zeza” të futbollit kanë vendosur të mos i përdorin bilbilat dhe flamurët e tyre në të gjitha ndeshjet e “ëeekend”-it shqiptar të futbollit. BAFSH ka shpërndarë një komunikatë, në të cilën zbardh arsyet e bojkotit dhe kërkon mbështetje nga të gjithe aktorët e shoqërisë shqiptare.

Kulli “dush të ftohtë” sulmuesve

2011-12-07T19:02:00.001+01:00

Lezhianët kanë pushuar këtë të hënë, për të rifilluar dje stërvitjen, për një ndër takimet më të rëndësishme të kësaj jave. Rezultatet pozitive të dy ekipeve si dhe rivaliteti në tabelën e klasifikimit, e bëjnë këtë sfidë si më të fortën e javës së 13-të të Kategorisë së Parë. Padyshim këtë e forcon më tej edhe fitorja në transfertë e ekipit të Kukësit në Skrapar, çka i ka shtuar "oreksin" kuksianëve, për të besuar në një ngjitje një kategori më sipër. Prononcimet e trajnerit Kulli mbas takimit, flasin për një pakënaqësi të tij për rastet e humbura. Analiza e sotme do të jetë prologu i një jave, që duhet të korrigjojë defektet e vërejtura, jo vetëm për takimin e fundit, por në përgjithësi të këtyre javëve që kanë kaluar.

Tekniku do t’i qëndronte pa ndryshuar, asaj që do të thoshte mbas takimit me Adën. “Fitorja është fitore dhe nuk gjykohet, vetëm festohet. Por ne po mendojmë, që fitoret të jenë më bindëse, pse jo t’i përgjigjen lojës që ne zhvllojmë. Është kjo arsyeja, që kam rezerva për repartin sulmues edhe pse si futbollistë janë të talentuar. E bëjmë mirë lojën deri në momentin e shënimit dhe atëherë kur kërkohet përqendrim më i madh, aty edhe na mungon agresiviteti që kërkon shënimi i golit. Është finalizimi që na ndëshkon, prandaj duhet të reagojmë për ta riparuar këtë.

Me këtë nuk dua të them, se Ada ishte një ekip i dobët dhe mund t’i mundje me goleadë. Jo, përballë kemi patur një ekip të organizuar shumë mirë, që në disa raste na e ndërlikoi situatën. Gjithsesi, këto janë kritika që i shërbejnë përmirësimit të vazhdueshëm. Kemi zhvilluar 13 javë, që me ndonjë përjashtim e kemi arritur objektivin, por sukseset duhet të na shërbejnë, për të vazhduar ecurinë e mëtejshme. Përpara kemi një transfertë fqinjësh, që i kanë shtuar ambicjet e tyre edhe nga rezultatet që kanë arritur, si dhe që janë formatuar nga një merkato cilësore. Mendoj se duke parë situatën në kampin tonë, por edhe në atë kundërshtar, forcat janë të balancuara.

Por jashtë nga modestia, futbollistët e mi, një nga një, janë dukshëm me kualitativ. Është harmonizimi në grup, që jep rezultatin dhe kjo na ka funksionuar. Do jetë një takim rivalësh, që ne do ta përgatisim me kujdes. Rëndësi ka, që skuadra jonë ka ardhur duke e rritur lojën edhe pse rezultatet nuk i janë përputhur. Le të shpresojmë se do të kemi një takim “fair play” dhe fituesi do të respektohet”, ka përfunduar tekniku lezhian, Ridvan Kulli.

Burimi: Sport Ekspres

2011-11-28T20:37:00.001+01:00

Besëlidhja arrin të marrë një fitore-surprizë në Elbasan, duke mposhtur vendasit me rezultatin e ngushtë 0-1.Goli i vetëm i takimit u shënua në pjesën e dytë dhe ka si autor sulmuesin Vocaj. Ishte një lojë tërësisht e vaktë, ku të dyja skuadrat zhvilluan një paraqitje të dobët. Miqtë nga Lezha janë treguar më të saktë se vëndasit në rastet që janë krijuar, duke arritur kështu të marrin edhe fitoren e parë në këtë sezon. Duhet theksuar se Elbasani e nisi ndeshjen pa tre titullarë, që ishin lënë në stol nga stafi teknik, duke e nënvlerësuar ekipin mik, por që rezultoi një “vetëvrasje”. Për nivelin e lojës së dobët u bë shkak edhe terreni në fushën e vjetër sportive “Shefqet Lamçja”.

Elbasani – Besëlidhja 0–1
Elbasani: Balukja, Hela, Kalallari, Turhani, Salla, Çarhoshi, Qemalli, Kotherja, Bullari, Laze, Lutaj (u aktivizuan: Alla, Mukja, Tupi). Trajner: S. Dalipi
Besëlidhja: Jakaj, Kalemi, Pervathi, Marku, Përgjini, Simonaj, Gjyrashi, Dodaj, Fusha, Makeldaj, Vocaj. Trajner: O. Gjyrashi
Shënues: Vocaj 58’
Gjyqtarë: E. Guçe, S. Met’hoxha, R. Zeneli (Lushnjë)

Java 11: Gramozi - Besëlidhja 0:1. Vjen edhe fitorja e parë në trasfertë

2011-11-26T15:53:00.001+01:00

Besëlidhja, pas tifos për Elbasanin, mendjen tek e shtuna

2011-11-19T10:59:00.001+01:00

Edhe pse fitorja e Luftëtarit me Elbasanin, nuk është pritur aspak mirë, përsëri lezhjanët shpresojnë, se kampionati do t’u japë mundësinë në këto 21 javë, që të tregojnë forcën e tyre. Mbasi kanë kolauduar ekipin, lezhjanët po presin që në këtë sfidë të rikthehen tek fitorja, jo vetëm në rezultat, por edhe me një lojë bindëse. Gramshiotët do të gjejnë në këtë takim edhe dy ish-futbollistët e tyre, sikur është mbrojtësi Peqini dhe mesfushori Malasi. Të dy futbollistët do të flisnin me konsiderata për “aventurën” në ekipin e Gramshit, por sipas mbrojtësit Peqini: “Ne jemi profesionistë dhe ana sentimentale është vetëm një ndjesi emocionale dhe jo primare. Edhe pse kemi qenë të vlerësuar në Gramsh, ndoshta ajo që na largoi kanë qenë objektivat e ekipit.

Aty flitej vetëm për qëndrim në këtë kategori, ndërsa këtu në Lezhë, ngjitja një kategori më sipër është detyra primare dhe të gjitha investimet flasin për një ekip, që këtë objektiv e kanë të arritshëm. E respektoj ish-ekipin tim – vazhdon komentin e tij Peqini - sepse ka bërë goxha ndryshime dhe investime në futbollistë, por edhe ka bërë një paraqitje të mirë në këto javë, por nuk shikojë ndonjë rreze shprese, që të mund të përballojë ekipin e Besëlidhjes, në stadiumin tonë. Këtë nuk e them me eufori dhe se jam pjesë e skuadrës lezhjane, por sepse kjo është një e vërtetë e dukshme. Ajo që u tregojë unë ish kolegëve është, se këtu në Lezhë nuk ka presione të jashtëme.

Rezultati do të jetë produkt i asaj që kanë dhënë ekipet në fushë. Nëse ata do ta meritojnë fitoren, të jenë të sigurt se do të duartrokiten nga tifozeria jonë edhe pse do të jetë e padëshiruar nga ne. Këtë kërkojmë nga takimet që kemi në transferta. Por duke njohur të dy ekipet mendoj se do të jetë një sfidë paqësore, por për rezultatin e kam bindje, që fitojmë madje me diferencë golash. Aq më tepër, që edhe statistikat historike flasin për sezonin e kaluar, katër pikë për Besëlidhjen dhe një për Gramshin”, ka përfunduar qendërmbrojtësi tiranas i Besëlidhjes, Peqini.

Burimi: Sport Ekspres

Tekniku Ridvan Kulli bën edhe psikologun

Trajneri Kulli i kërkon ekipit të tij të qëndrojë me këmbë në tokë

2011-11-01T14:09:00.000+01:00

Ecuria e lezhjanëve është vërtet e kënaqshme, por tekniku kërkon të mos “fluturohet”. Me një analizë formale ka nisur java stërvitore e lezhjanëve. Tashmë, paraqitja dhe fitoret e njëpasnjëshme e kanë kthyer në “modë” këtë formalizëm edhe pse trajneri Kulli është i “pangopur” duke kërkuar dhe kritikuar parreshtur, për të përmirësuar paraqitjen e të tijve Por, ajo që i tëmbet më tepër njëshi i stolit lezhjan është qëndrimi “fluturimi”. Fitorja me Besën, përpos tre pikëve, ka çertifikuar edhe dilemën e retorikës se Besëlidhja ishte një ekip i rastësishëm me këto rrezultate, apo një pretendentë më shumë se serioze? Natyrshëm, retorika e ka edhe përgjigjen. Gjithsesi, tekniku i mirënjohur, mbasi do të falënderonte futbollistët e tij, por edhe duke kritikuar të metat e vërejtura të këtij takimi, do ta quante të kryer “misionin”.

“Ashtu sikur edhe pritej, ka qenë një takim i vështirë”, do të niste Kulli për “Sport Ekspres”. “Besa është Besë dhe sado jashtë forme të jetë, e ka “hijen” e rëndë. Po unë do të thosha se ka qenë një ndër ekipet pretendente që ka bërë paraqitjen më të mirë deri tani. Edhe pse kemi fituar, takimi i ka patur brenda të tre rezultatet. Mungesat, presioni që krijohet tek futbollistët kur luan me një ekip të fortë dhe aq më tepër kur objektivi është i “panegociueshëm”, vetëm fitore, ta krijonë një “ngërç” që të frenon për të dalë atje ku e kishim përgatitur ndeshjen. Gjithsesi, jam i kënaqur që kemi një ecuri pozitive dhe ajo që do t’i trembesha më shumë është euforia. Kampionati është i gjatë dhe përpara na presin shumë sfida të vështira, madje jo pak i vështirë është edhe takimi i së shtunës me Ilirinë, prandaj duhet të qëndrojmë me “këmbë në tokë”. Në se vazhdojmë kështu grupi i ka forcat për ta përballuar me sukses deri në fund garën" .

Pyetjes, për prononcimin e presidentit Bizhdili, për mikpritjen lezhiane, tekniku Kulli do t’i përgjigjej: "Po, ne jemi një ekip i traditës. Nuk dua të bëj “Belulin”, duke u mburrur por organizimi i ndeshjeve në Lezhë është në sistem. i them presidentit kavajas se ky ambient nuk është vetëm për Besën, apo për një rast kur jemi të vëzhguar nga FSHF, por edhe për një ndeshje fëmijësh. Tek ne fiton Besëlidhja se luan më mirë, por në të kundërt kushdo mund ta fitojë ndeshjen dhe të duartrokitet. Pastaj, ne jemi një ekip i investuar dhe jo i rastësishëm që kërkojmë të marrim një fitore me presione, apo me gjyqtarë, aq më tepër, më shumë se ne, askush nuk mund ta kuptojë këtë lloj penaliteti, sepse e kemi vuajtur sezonin e kaluar deri aty sa jemi këtë vit përsëri në këtë kategori", do të përfundonte Ridvan Kulli, trajner i ekipit Besëlidhja.

Burimi: Sport Ekspres

U-19: Lezhjanët fitojnë me meritë dhe janë të vetëm në krye

2011-10-31T12:51:00.000+01:00

Lezhianët marrin fitoren e dytë radhazi në shtëpi, duke mundur këtë herë ekipin e Kukësit, që deri disa ditë më parë ka shfaqur premisa për të mbajtur kreun e për t’u ngjitur në kategorinë superiore vitin e ardhshëm. Vendasit nuk falin, teksa në minutën e 8-të Mashi shënon golin e parë, ndërsa pas tij në minutën e 27-të Dajan gjen golin e dytë. Me kaq mbyllet pjesa e parë.

Në pjesën e dytë loja zhvillohet më e bukur, me sulme të shpejta të miqve, që kërkojnë të gjejnë një gol, por vendasit u kundërpërgjigjen sulmeve të tyre me golin e dytë të Danajt në minutën e 76-të. Miqve nuk u mbetet gjë tjetër, ndaj hidhen në sulm. Ata shënojnë golin e nderit me Brashën në minutën e 86-të.

Besëlidhja – Kukësi 3:1
Besëlidhja: Hila, Mashi, Lushaj (Pjetëri 34’), Marku, Lleshi, Haxhia, Hoxha, Danaj, Nika, Zeqja, Dedgjoni (Gjergji 51’). Trajner: V. Sokoli
Kukësi: Hasanaj (Syla 51’), Myzyraj, Halilaj, Nela, Cenaj, Brasha, Kotarja (Spahia85’), Bytyçi, Pashaj, Jonuzi, Lenaj. Trajner: A. Alinçi
Shënues: Mashi 8’, Danaj 27’, 76’ / Brasha 86’
Gjyqtarë: A. Lleshi, S. Haxhi dhe E. Çuni (Laç)

Kulli: Realizuam objektivin tonë pa bërë një lojë të bukur

2011-10-31T09:09:00.001+01:00

“Fitorja me rivalë që janë pretendent për në Superiore na ngroh, pavarësisht se nuk ishte një ndeshje ashtu siç e menduam. Skuadra u tregua pragmatiste, atëherë kur u desh që të shënonim. Sipas mendimit tim, loja nuk qe e mirë, por objektivin e realizuam, duke shënuar dy herë në pjesën e dytë”.

Java 8: Besëlidhja - Besa 2:0. Lezha mbetet tabu

2011-10-29T16:28:00.003+02:00

Tjetër fitore në Lezhë për Besëlidhjen, ndaj një tjetër pretendenteje të fortë për Superligën. Kësaj here ka qënë skuadra e Besës që ka provuar ferrin lezhjanë. Edhe kavajasit si të gjitha të tjerat, dalin me zero pikë nga stadiumi "Besëlidhja" duke u mundur me rezultatin 2:0. Çdo gjë vendoset në pjesën e dytë të takimit dhe mban firmën e dy futbollistëve serbë të Besëlidhjes. Eshtë Trajkoviç që dërgon lezhjanët në avantazh me anë të një goditje dënimi dhe pastaj Miliç dyfishon rezultatin për vëndasit duke i dhuruar kështu Besëlidhjes një tre pikësh mjaft të rëndësishëm. Lezhjanët ngjiten në kuotën e 17 pikëve dhe ndodhen në vëndin e dytë në rënditje, 1 pikë poshtë Luftëtarit të vëndit të parë që fitoj edhe sot në Gjirokastër ndaj Burrelit. Ndeshjen e ardhshme Besëlidhja do të udhëtojë për në Fushë Krujë për tu ndeshur me ekipin e Ilirisë. /ksbeselidhja

Besëlidhja - Besa 2:0
Besëlidhja: Xhika, Kepi, Peqini, Stojkoviç, Gruda, Malasi, Pepa, Trajkoviç, Miliç, Jacaj, Mehja (Buraku 60’) (Methasani 77’). Tr. R.Kulli
BESA: Bakaj, Hoxha, Fejzullahu, Ndoni, Dhëmbi, Duka, Poçi, Rroshi, Dushku (Peraj 75’), Mihani, Bubeqi (Hasa 81’). Tr. G.Magani
Gjyqtarë: B.Pashaj, R.Avdo, F.Mata (Tiranë)
Kartona të verdhë: Jacaj, Malasi/ Dhëmbi, Hoxha
Karton i kuq: Dhëmbi

Lezhjanët: Barazimi? Edhe të tjerët do të vuajnë

2011-10-24T22:44:00.002+02:00

Bashkë me rezultatin e barabartë, takimi midis vendasve të Burrelit dhe Besëlidhjes ka sjellë edhe “paqen” në marrëdhëniet midis futbollistave, tifozerive, pse jo edhe të stafeve drejtuese të këtyre dy ekipeve. Me kulturë dhe sportivitet janë inkurajuar skuadrat nga mbështetësit e tyre edhe pse asnjë prej ekipeve nuk u ka pëlqyer rezultati. Ashtu sikurse është bërë zakon, ekipi ka festuar pas ndeshjes së bashku me tifozerinë e tyre, në një nga lokalet që ndodhet në rrugën Burrel- Lezhë edhe pse rrezultati nuk ka qënë i dëshirueshmi. Lezhianët me barazimin kanë lëshuar edhe kreun e renditjes për këtë javë, por kjo do të jetë e përkohësisht sikurse thotë autori i golit, Ervin Malasi.

“Ndoshta barazimi nuk ishte rezultati që dëshironim, por duke parë zhvillimin e lojës, si dhe mungesat tona mendoj, se ka qënë një rezultat i pranueshëm. Edhe pse Burreli nuk është në pozicion të mirë në klasifikim, e vërteta është se ka një grup të organizuar. Ndërsa ne vinim në këtë takim me mungesa të konsiderueshme, ku edhe një pjesë e futbollistëve që luanin kanë sakrifikuar edhe pse kanë qenë të pamundur. Edhe pse objektivi ynë është t’i fitojmë të gjitha takimet, barazimi është pozitiv, duke menduar se rivalët tanë do të kenë shumë pak mundësi të fitojnë në Burrel. Mendoj se ky pozicion është i përkohshëm, mbasi kemi për t’u rikthyer shumë shpejt në krye. Kampionati është i gjatë dhe ne i kemi kapacitetet për ta marrë kreun, ndoshta që javën që vjen, duke mundur një rival të drejtpërdrejt, sikurse është Besa”, përfundon mallakastrioti i Besëlidhjes, Malasi.

Burimi: Sport Ekspres

Java 7: Burreli - Besëlidhja 1:1. Lezhjanët humbasin kreun

2011-10-22T16:12:00.000+02:00

Besëlidhja nuk arrin më shumë se një barazim 1:1 në Burrel. Ashtu si sezonin e kaluar lezhjanët dalin vetëm me një pikë nga Burreli duke humbur kështu edhe vëndin e parë në rënditje. Një ndeshje me pak emocione ku të dyja skuadrat luajnë me ritme të ulëta. Në pjesën e parë kemi vetëm një rast të rrezikshëm për të dyja skuadrat, Radaj për burrelasit dhe Malasi për lezhjanët. Ndërsa pjesa e dytë nis më emocionuese, me vendasit që kalojnë në avantazh me më të mirin e skuadrës së tyre, Radaj, por avantazhi zgjatë vetëm tre minuta, pasi është Malasi, më i miri në fushë deri në ato momente, që barazon rezultatin për Besëlidhjen. Mbyllet kështu në barazim 1:1 takimi i javës së shtatë, Burreli - Besëlidhja.

Burreli - Besëlidhja 1:1
Shënues: Radaj 55, Malasi 58'

Burimi: ksbeselidhja.com

Xhika: Për Besëlidhjen nuk ka fusha të vështira

2011-10-20T15:37:00.001+02:00

Portieri i lezhjanëve thekson se ekipi i tij është i ndërtuar për sukses dhe nuk diskuton asnjë kundërshtar, madje as në transferë. Besëlidhja kryeson renditjen e kategorisë së parë pas 6 javësh kampionat, ku ka treguar më shumë stabilitet se skuadrat e rëna nga superliga, që janë konsideruar kandidate kryesore për t’u ngjitur në të. Filozofia e presidentit Gjokë Noka dhe e bashkëpunëtorëve të tij duket se po jep rezultat. Edhe pse pa shume emra impresionues, lezhjanët po bindin se janë kandidatë kryesorë dhe jo më kot qëndrojnë në vend të parë. Përveçse kanë marrë pikë në fushën e Lushnjës, ata kanë mundur deri tani dy nga rivalët e drejtpërdrejtë, Elbasanin dhe Luftëtarin.

Portieri i Besëlidhjes, Dashamir Xhika, i cili luan sezonin e dytë me fanellën lezhjane, thekson se kjo skuadër është ndërtuar për të qenë fituese dhe nuk ka diskutim se në fund të kampionatit do të jenë në superligë, madje edhe si kampione e kategorisë së parë. Xhika pranon se fitorja me Butrintin u arrit me vështirësi, por nuk duhet gjykuar nga ajo ndeshje, ku ndikuan faktorë të ndryshëm. “Gardiani” i portës lezhjane thekson se Besëlidhja është një skuadër, që nuk pyet se ku luan dhe kundërt kujt, por thjesht synon fitoren në çdo 90-minutësh.

Butrinti “Vërtet fituam minimalisht në ndeshjen e fundit, por askush nuk mund të na gjykojë nga kjo ndeshje. Me Butrintin luajtëm në kushte atmosferike shumë të vështira, ku ishte e pamundur të flisje për cilësi. Pjesën e parë e kishim erën kundër dhe unë kisha shumë frikë. Gjithsesi, e rëndësishme është që morëm 3 pikët, që janë parësore në raste të tilla,” – thotë Xhika, duke iu referuar ndeshjes së fundit, ku lezhjanët fituan ndaj sarandiotëve falë një goli të Jaçajt.

Burreli “Të gjthë e konsiderojnë të vështirë transfertën e Burrelit, por ne shkojmë me besim në këtë ndeshje, sepse kemi një skuadër të ndërtuar për të fituar në çdo fushë. Këtë e kemi treguar deri tani, duke mundur dy nga rivalët tanë dhe duke marrë pikë në Lushnjë. Nuk them se do të jetë e lehtë dhe ne e kemi të garantuar fitoren, por, si në çdo 90-minutësh do të mundohemi ta bëjmë si duhet detyrën tonë, që në fund të marrim rezultat pozitiv. Burrelin e respektojmë për vlerat që ka, por shkojmë atje për të treguar se jemi Besëlidhja kryesuese,” – thekson portieri kryeqytetas në lidhje me ndeshjen e radhës.

Korrektësia financiare “Te Besëlidhja ka shumë faktorë që ndikojnë në suksesin e saj, por them se korrektësia financiare është kryesorja. Gjithçka është e garantuar për skuadrën tonë në këtë aspekt, kështu që të gjithë kemi motivin e duhur dhe jemi para përgjegjësisë për të dhënë atë që kërkohet. Besoj se do të ecim me ritmin e duhur deri në fund dhe, përveç superligës, nuk ka pse të mos fitojmë dhe titullin,” – ka përfunduar portieri i Besëlidhjes, Xhika.

3 gola ka pësuar Xhika në 6 ndeshjet e deritanishme, ku ka qenë titullar i padiskutueshëm. Kryeqytetasi u bashkua me skuadrën lezhjane në janar të vitit të kaluar dhe, me paraqitjen e tij të mirë, e ka bindur presidenti Gjoka për ta mbajtur në Lezhë.

Burimi: Sporti Shqiptar

Kulli: Nuk treguam vlerat tona reale, pasi na pengoi shumë era

2011-10-17T23:08:00.000+02:00

Edhe pse nuk jam shprehur, në fakt i jam druajtur euforisë, një sëmundje shumë e keqe dhe erës, një kundërshtarë shumë i rrezikshëm. Dhe në fakt, në pjesën e parë, e para u shfaq tek disa futbollist, ndërsa e dyta gjatë gjithë lojës. Ju mund të thoni se era ishte njëlloj për dy skuadrat, ndërsa unë them se u shkonte për shtat sarandiotëve, që donin të merrnin një pikë kurse ne na duhesh ta zgjidhnim ndeshjen sa më parë. Natyrisht që edhe kundërshatri ishte në një ditë të mirë dhe na vuri në vështirësi. Duke qenë kështu më gëzon fitorja edhe fakti që vazhdojmë të ruajmë kryesimin.

Besëlidhja u falet edhe një herë këmbëve të Jaçajt

2011-10-17T23:05:00.002+02:00

Me “kostumin” e kryesuesit dhe në prani të tifozërisë së vet, Besëlidhja pritej të ishte e motivuar për të marrë 3 pikët ndaj miqve nga Saranda, të cilët gjithashtu kishin ardhur për pikë. Fillimi i ndeshjes është i ekuilibruar dhe ekipet shpërdorojnë nga një rast, vendësit me Dibrën dhe miqtë me Kolën. Në të 32-ën Butrinti humbet rastin më të pastër për të shënuar, kur Papa, brenda zonës, godet fort në portën e boshatisur, por topi nuk i bindet dhe gjen traversën lezhjane. Pas 30 minutash lojë me gabime të dyanëshme, ekipi mik shfaqet tepër rrezikshëm te porta e Xhikës. Besëlidhja e ul disi ritmin, ndërsa futbollistët miq, duke parë mefshtësinë lezhjane, lëshohen në gjysmëfushën e Besëlidhjes për ta goditur portën e Xhikës, pse jo dhe për të shënuar, por fati nuk ishte me Papën.

Pjesa e parë mbyllet e bardhë, pasi Besëlidhjes i mungon organizimi, manovra sulmuese, gjuajtjet në portë, kontrolli i kundërshtarit dhe lufta për topin e parë. Ekipi lezhjan është larg lojërave të mira e rezultative të zhvilluara në 5 ndeshjet e deritanishme. Kurse Butrinti, pas një hezitimi 10-minutësh, e kërkon golin. Edhe pjesen e dytë, megjithë ndihmën e erës karakteristike lezhjane, Besëlidhja pak ka korrigjuar në lojë. Edhe sarandiotët vazhdojnë të mbrohen mirë, të organizohen në mesfushë, por pa rrezikuar Xhikën.

Megjithëse nuk janë bindës, lezhjanët arrijnë të shenojnë në të 70-ën, kur Jaçaj, i aktivizuar në fund të pjesës së parë, shfrytëzon në mënyrën më të mirë një top të kthyer nga mbrojtja dhe godet fort nga distanca, duke e kaluar Besëlidhjen në avantazh. Është goli i dytë i Jaçajt me vlerën e 3 pikëve, pasi një të tillë u ka shënuar edhe gjirokastritëve para dy javësh. Goli e ka zbukuruar lojën dhe vendësit kërkonjë dyfishimin, ndërsa miqtë barazimin. Nëse Miliç e kishte mundësinë për dyfishim, sarandiotët nuk e patën një mundësi të tillë për të udhëtuar drejt Sarandës me një pike.

Burimi: Sporti Shqiptar

Java 6: Besëlidhja - Butrinti 1:0. Lezhjanët ruajnë kryesimin

2011-10-15T16:00:00.002+02:00

Besëlidhja përsëri nuk fal në Lezhë. Viktima e rradhës Butrinti i Sarandës, i sapongjitur në kategorinë e parë. Vendos mesfushori Ervit Jacaj me një gol në minutën e 70' të pjesës së dytë. Sarandiotët rezistojnë mjaft mirë për 70 minuta duke mos i dhënë shumë mundësi shënimi Besëlidhjes në pjesën e parë. Por në pjesën e dytë me hyrjen në lojë të Jacajt, gjithçka ndryshon dhe vetëm fati dhe shtyllat e shpëtojnë Butrintin nga një goleadë në Lezhë. Besëlidhja fiton përsëri në Lezhë, ndonëse me një rezultat minimal por megjithatë duke kënaqur tifozerinë lezhjane me lojën e saj. Falë kësaj fitoreje Besëlidhja e ruan kryesimin e rënditjes me 13 pikë, por me Luftëtarin dhe Elbasanin që kanë një ndeshje për të rekuperuar me njëra tjetrën.

Besëlidhja - Butrinti 1:0
Shënues: Jacaj

Besëlidhja: Xhika, Kepi, Peqini, Stojkoviç, Gruda, Pepa, Malasi (Shytani 53’),Trajkoviç, Miliç, Dibra (Jaçaj 42’),Gavriloviç (Mehja 87’). Trajner: R. Kulli.
Butrinti: Demi, Xhuvani, Xhibro, Alzeneli, Zharkalliu, Kola, Ngjela, Muço, Ezerioha (Tepelena 85’), Papa, Sulejmani. Trajner: M. Gurma.
Gjygjtarë: R. Sadiku (Elbasan), G. Qirici (Tiranë), F. Lamaj (Durrës)
Kartonë të verdhë: Demi, Alzeneli, Papa,Sulejmani,Trajkoviç

Burimi: ksbeselidhja.com

Trajneri Kulli i huton të gjithë në stërvitje!

2011-10-13T19:14:00.002+02:00

Në testin e djeshëm të kontrollit, tekniku lezhjanë Ridvan Kulli ka kërkuar të provojë futbollistët e tij, për të përcaktuar 11-shin e titullarëve, që do të fillojnë lojën përballë skuadrës së Butrintit ditën e shtunë. Në të dyja pjesët e lojës së testit përbërjet kanë qenë të ndryshme, por disa futbollistëve të veçantë u janë ndërruar rolet. Mungesa e mbrojtësit Aldi Shyti, i dëmtuar në ndeshjen e së shtunës me Lushnjën, ka detyruar Kullin, që në vendin e tij të tërheqë mesfushorin Gruda, i cili duket se përballë sarandiotëve do të ketë pikërisht këtë rol. Kjo sepse në një fraksion loje në rolin e mesfushorit të majtë ka luajtur Gavriloviç, kurse në pjesën e dytë shkodrani Dibra. Por në fraksionin e dytë të testit-provë, ajo që ka bërë përshtypje ka qenë kalimi i Kepit nga mbrojtës i majtë, në rolin e mesfushorit të djathtë. Ndërsa finalizimin e veprimeve sulmuese, ashtu siç ishte parashikuar, Kulli ua ka besuar dy serbëve, Gavriloviç dhe Miliç.

Sidoqoftë, formacioni dhe vendosja e futbollistëve në pjesën e dytë ka funksionuar më mirë dhe drejtuesit e skuadrës, duke mbetur të kënaqur, ka të ngjarë që tani të kenë përcaktuar si përbërje të skuadrës atë që mbylli ndeshjen e kontrollit. Ndërkohë, ajo që ka rënë në sy në këtë test kontrolli ka qenë kërkesa e teknikut Kulli ndaj skuadrës, për të ushtruar presing me pjesmarrjen e të gjithëve dhe në mënyrë të vazhdueshme. Kështu që lezhjanët po përgatisin për të vënë përballë sarandiotëve një skuadër që vetëm do të sulmojë. “Duke luajtur në këtë mënyrë, skuadra jonë do ta zgjidhë ndeshjen shpejt dhe asnjëherë nuk do ta vërë në diskutim fitoren e saj”, është shprehur mesfushori lezhjanë Mirsad Gruda, ndërkohë që edhe tifozeria lezhjane pret që skuadra e saj të koleksionojë fitoren e katërt dhe të mos e lëshojë kreun e renditjes.

Dëmtimet - Në ndeshjen e rradhës me Butrintin, tekniku Kulli nuk do të ketë në dispozicion dy futbollistë, të cilët pothuajse në të gjitha ndeshjet e zhvilluara kanë qenë pjesë e skuadrës. Mesfushori shkodran Jacaj, i cili i ka siguruar skuadrës lezhjane tre pikë të çmuara me golin e shënuar ndaj Luftëtarit është i dëmtuar gjatë stërvitjes, që para ndeshjes me Lushnjën. Ai është parë duke bërë stërvitje të diferencuar, kryesisht vrapime, dhe duket se vështirë se mund të jetë i gatshëm për lojë ditën e shtunë. Ndërsa mungesa e dytë është ajo e mbrojtësit Shyti, i cili është dëmtuar në fund të pjesës së parë në Lushnjë dhe sipas mjekëve për një javë ai do të qëndrojë pushim.

Burimi: Sport Ekspres

Demi, një lezhjan kundër Besëlidhjes

2011-10-13T19:11:00.000+02:00

Seancat stërvitore në prag të takimit të kësaj të shtune, Besëlidhja - Butrinti, shkojnë sinkron me pretendimin e të gjithë ekipit, për të marrë trepikëshin e fitores në Lezhë. Besimin dhe vendosmërinë e lojtarëve e ka shtuar edhe marrja e trajtimit të kënaqshëm financiar mujor. Kjo ka reflektuar edhe në qenien më të motivuar të të gjithëve në ndeshjen e kontrollit, të zhvilluar pasditen e djeshme. Portieri Elson Demi, është shprehur për “Sport Ekspres” se si e pret dhe e vlerëson këtë përballje, kundër skuadrës së qytetit të tij.

- Cili është vlerësimi yt për takimin Besëlidhja - Butrinti?

- Shpesoj që unë të jem më realisti ndër kolegët në vlerësimin e kësaj përballjeje. Po them se na pret një ndeshje të vështirë ndaj Besëlidhjes së Lezhës, skuadrës së vendlindjes sime.

- Ndoshta edhe t’i do ndjehesh keq në atë përballje?

- Sigurisht, nuk e mohoj që do të provoj emocione të forta.

- Përtej personales, çfarë mendon për ekipet?

- Mund t’i garantoj te gjithë, që Butrinti është superior ndaj “patriotëve” të mi. Janë vetë rezultatet, por edhe golavarazhi, që e tregojnë këtë, si dhe përgatitja që i bëjmë vetes për fitore.

- Si ka ndikuar psikologjikisht humbja me Himarën dhe barazimi në shtëpi me Skraparin?

- Është e dukshme, se rezultatet e dy takimeve të fundit nuk na kanë ulur entuziazmin që ekziston në ekip dhe në transfertën e rradhës do të bëjmë më të mirën e mundshme.

- Cila është garancia që jep se nuk do lejosh prekjen e rrjetës tënde?

- Garantoj se do të meritoj nofkën e “supermenit", siç më thërrasin tani në Sarandë. Do ta ruaj portën sarandiote, ashtu si edhe në tri ndeshjet e para të kampionatit, që e mbajta të paprekur. Kështu do të ndodhë edhe në Lezhë.

- Cili është parashikimi yt për sulmin?

- Shpresoj që sulmi të jetë në ditën e tij më të mirë, pasi nuk e vë në dyshim se prapavija nuk do të çedojë.

Burimi: Sport Ekspres

Kepi, thekson se pozicioni aktual i skuadrës nuk është kalimtar

2011-10-13T14:59:00.000+02:00

“Besëlidhja nuk është rastësisht në krye të kategorinë e parë dhe këtë do ta tregojë, duke u konfirmuar si pretendente ndeshje pas ndeshjeje.” Ky është konkluzioni i njërit prej titullarëve të ekipit lezhjan, Bruno Kepit. Besëlidhja udhëheq renditjen dhe me rezultatet e javëve të fundit e ka vërtetuar se është pretendente kryesore për në superligë. Pasi mundi në shtëpi Elbasanin dhe Luftëtarin, skuadra lezhjane mori një pikë të rëndësishme në transfertën e Lushnjës, që i ka mjaftuar për të qenë në krye të klasifikimit. “Të marrësh pikë në Lushnjë është vërtet shumë mirë, pasi kemi të bëjmë me një rival direkt, pavarësisht se kishim mundësi të fitonim. Megjithatë, rëndësi në këtë garë, sidomos në ndeshjet jashtë, është që të mos humbasësh,” – ka vijuar më tej mbrojtësi shkodran.

Meritë dhe jo rastësi Duke analizuar forcën e skuadrës ku bën pjesë, për Kepin ngjitja e Besëlidhjes në krye të renditjes nuk është një rastësi. Ai rreshton disa faktorë, që e kanë sjellë Besëlidhjen në krye: “Dikujt mund t’i duket rastësi, që Besëlidhja është e para, por për ne që jemi brenda skuadrës dhe punojmë çdo ditë me shumë përkushtim, nuk është kështu.

Për ne është diçka më se normale. Duke parë investimet e presidentit Noka, përkushtimin në punë të trajnerit Kulli, si dhe ndërtimin e një skuadre, që çdokush do ta kishte zili, Lezha e meriton të jetë në krye. Ky pozicion nuk është kurrsesi kalimtar. Besëlidhja do të jetë pretendentja kryesore për në superiore dhe pa dyshim që do ta çojmë aty ku i takon kësaj skuadre.

Ndeshja me Butrintin në fushën tonë do të ketë vlerësim maksimal, si çdo ndeshje tjetër. Nuk ka kyshime që ajo do të konkretizohet me një fitore, duke u konfirmuar kështu si një skuadër kryesuese dhe duke gëzuar tifozërinë tonë të zjarrtë.”

Burimi: Sporti Shqiptar

Besëlidhja, dy serbë për të mbyllur ndeshjen

2011-10-12T15:20:00.003+02:00

Lezhjanët kanë lënë pas shijen e mirë të asaj pjese të parë të luajtur në Lushnje dhe marrjen e një pike, ndërsa që ditën e hënë kanë startuar përgatitjet për ndeshjen e radhës, ku përballë do të jetë skuadra sarandiote. Për lezhjanët, gjithmonë deputuesit kanë qenë disi të frikshëm, sepse ka ndodhur që ata të bëjnë një rezistencë të paparashikuar, madje në ndonjë rast i kanë hequr pikë Beslëidhjes, prandaj dhe vlerësimi për rastin konkret është ai që duhet. Gardiani Dashamir Xhika, i cili pretendon se e njeh kampionatin e Kategorisë së Parë ka shtuar, se sarandiotët duhen marrë seriozisht, pasi pavarësisht se janë deputues, me paraqitjen e tyre në këto ndeshjet e para kanë treguar nivel dhe këmbëngulje, për të mos u mposhtur lehtë.

Në kuadrin e përgatitjeve që po bëhen për këtë ndeshje, po punohet që skuadra të jetë e garantuar në prapavijë dhe kjo sipas Xhikës do jetë ajo që do t’i japë siguri skuadrës së tij, ndërsa ka kërkuar nga reparte të tjera të bëjnë punën e tyre për të zhbllokuar rezultatin, sa më shpejt dhe për të kënaqur me lojë lezhjanët që do të ndjekin ndeshjen. Në fakt, për këtë, më shumë se askush po mendon tekniku Kulli, i cili duket se me këtë ndeshje do t’u japë fund edhe eksperimentimeve për të përcaktuar 11-shin e titullarëve dhe vendosjen e tyre në fushë.

Ashtu si në ndeshjen me Lushnjën, ku duket se është bindur nga loja e futbollistëve në rolet e caktuara edhe në këtë ndeshje, trajneri lezhjan ka menduar që sulmin t’ua besojë dy futbollistëve serb, Gavriloviç e Miliç, ndërsa shkodranin Dibra do ta kthejë në rolin e mesfushorit të djathtë, rol të cilin në ndeshjen me Lushnjen e kreu mjaft mirë. “Në takimin e së shtunës me Lushnjen kam parë që Miliç e Gavriloviç janë kuptuar mirë me njëri-tjetrin mjaft mirë, madje edhe goli ka qenë produkt i kësaj dysheje.

Ndërsa Dibra i pozicionuar në mesfushë, me përgatitjen e lartë fizikë dhe treguesit e shpejtësisë mendoj se do të jetë një “piston” i vërtetë për skuadrën. Kemi mundësi, që funksionimin e tyre ta shohim edhe më mirë në ndeshjen me sarandiotët”, ka thënë Kulli. Ndërsa vazhdojnë përgatitjet, ku Kulli po tenton të zhvillojë një cikël javor stërvitjeje me ngarkesa e të larmishëm, duket se askujt nuk i shkon ndërmend se lezhjanët mund të gabojnë, aq më shumë në fushën e tyre.

Sidoqoftë, këto lloj skuadrash aq sa janë të mirëpritura në qytetin verior, po aq janë edhe të vlerësuara, më shumë për faktin se ato nuk njihen. Besëlidhja ka disa vite që nuk është përballur me sarandiotët, madje mbi 30 vjet, që kur ata kanë luajtur në Kategorinë e Dytë të asaj kohe. Ndërkaq, presidenti lezhjanë Gjokë Noka ka hapur dyert e zemrën e tij bujare, për të pritur sarandiotët, që në Lezhë vijnë me “ambasadorin” e tyre, lezhjanin Elton Demi, i cili luan për ngjyrat sarandiote.

Burimi: Sport Ekspres

Mirë me pikët; Kulli ka “siklet” kartonësh

2011-10-11T20:59:00.001+02:00

Serbi 23-vjeçar Vojsllav Trajkoviç, i cili këtë sezon ka ardhur tek Besëlidhja, në ndeshjen me Lushnjën ka qenë futbollisti më i vlerësuar i skuadrës, duke kryer mjaft mirë organizimin e lojës. Sipas specialistëve, ka qenë “truri” i Besëlidhjes, që në 45 minutat e para ka zhvilluar lojë të bukur e rezultative. Por, ndërsa ai e ka kryer më së miri detyrën e ngarkuar, ka një shqetësim për skuadrën, sidomos kur ajo luan në transfertë. Me një shqipe jo shumë të qartë ai shtron pyetjen retorike se, përse skuadra nuk luan deri në fund të ndeshjes si në ndeshjet që luhen në Lezhë. Për mesfushorin e talentuar të lezhjanëve është gabim që skuadra të tërhiqet pa nevojë, duke i lëshuar terren kundërshtarit, i cili, sipas tij, në rastin e Lushnjës, edhe mund të kishte ndëshkuar Besëlidhjen. Sidoqoftë, atij i dhimbsen dy pikë të lëna atje, sepse, “me lojën e rastet që krijuam, kemi qenë shumë pranë fitores”, thotë ai. “S’mund të shpërdorohet siç bëmë ne. Duhet përfituar, qoftë edhe nga një rast i vetëm. Në Lushnjë e patëm një të tillë, por nuk e shfrytëzuam…”, është shprehur Trajkoviç.

Shpërblimi - Menjëherë pas ndeshjes me Lushnjen, presidenti lezhjan, Gjokë Noka, sipas premtimit, u ka shpërndarë futbollistëve pagat mujore dhë shpërblimin për barazimin e arritur. Për pikën e fituar, presidenti ka akorduar nga 10 mijë lekë për çdo futbollist, ndërsa ka shtruar dhe një darkë gjatë kthimit për në Lezhë.

Në fakt, fubollistët lezhjanë, që me ardhjen e presidentit Noka në krye, asnjëherë nuk janë janë vonuar për pagat e shpërblimet. Ana financiare për skuadrën ka qenë e garantuar dhe ka ndikuar fuqishëm në motivimin e lojtarëve për të dhënë më të mirën e tyre.

Ndëshkimet - Në ndeshjen e së shtunës u ndëshkuan me karton të verdhë 3 futbollistë lezhjanë dhe sido të jenë akorduar ato, drejtuesit e skuadrës kanë tërhequr vëmendjen për këtë fakt. Për teknikun Kulli, ky “ritëm” kartonësh është ritëm i lartë e duhet ulur, për të mos thënë duhet eliminuar, pasi “do të dëmtohemi në ndeshjet që vinë”, shprehet ai. “Vëtëm në 4 ndeshje të zhvilluara, Stojkoviç skualifikohet për të mos luajtur një ndeshje; ka të tjerë që janë me dy kartona dhe për ne është shumë, prandaj duhet të jemi të kujdesshëm”, ka përfunduar trajneri i Besëlidhjes.

Burimi: Sport Ekspres

Tajneri Kulli i kënaqur me barazimin në Lushnje

2011-10-09T20:45:00.001+02:00

Na kënaq shumë kjo pikë, sepse e morëm ndaj një rivali të drejtpërdrejtë dhe në fushën e tij. Me këtë rezultat mbajmë kreun dhe kemi një distancë të konsiderueshme me Lushnjën, që do të ndeshet me ekipe, të cilat ne i kemi kaluar. Kemi bërë një pjesë të parë shumë të mirë dhe kemi qënë shumë të qartë. Me meritë kemi kaluar në avantazh. Nuk e kam përshtypjen se jemi tërhequr në pjesën e dytë, por arma më e fortë e Lushnjës ishin goditjet standarte, duke përdorur topat në ajër, që na krijuan shumë probleme dhe na krijuan vështirësi. Nëse do të kishim për këtë ndeshje dy lojtarë që na mungonin do të kishim bërë dhe marrë më shumë. Në pjesën e dytë nuk mund të bëhej fjalë për të qarkulluar topin, nga terreni dhe nga situatat.

Java 5: Lushnja - Besëlidhja 1:1. Lezhjanët lënë dy pikë në Lushnje

2011-10-08T17:11:00.001+02:00

Besëlidhja humbet dy pikë të rëndësishme në Lushnje. Pasi ka dominuar të gjithë pjesën e parë, duke e mbyllur me rezultatin 0:1 falë golit të sulmuesit Aleksandar Miliç në minutën e 24'. Besëlidhja zbret në pjesën e dytë pa energji dhe pa dëshirën për të mbyllur ndeshjen, dhe ndëshkohet në muìinutat e para të pjesësë së dytë nga Topi i cili shënon golin e barazimit për Lushnjarët. Në fundit e takimit madje rrezikon të dalë pa pikë nga Lushnja, në një ndeshje që mund ta fitonim pa problem. Pavarësisht hapit fals, që dhe mund të falet, pasi luanim në një fushë të vështirë kundrejt një skuadre me nivel siç është ekipi i Lushnjes, Besëlidhje ruan përsëri vëndin e parë me Luftëtarin që ka një ndeshje më pak kundrejt Elbasanit.

Java 5: Lushnja - Besëlidhja 1:1

Shënues: 24' Miliç, 49' Topi

Lushnja: Bejte, Sulo, E.Sula, Bufasi, Mërtiri (72' Metushi), Byzhyti, Topi, Dervishi (36' Gjoni), R.Sula (61' Ruço), Canka, Allkanjari. Tr. R.Baballëku
Besëlidhja: Xhika, Peqini, Shyti (46' Malasi), Kepi, Gruda, Shytani, Pepaj, Trajkoviç, Miliç (90'+ 2 Buraku), Dibra, Gavriloviç. Tr. R.Kulli
Gjyqtarë: B.Pashaj, D.Agaraj (Tiranë), R.Preça (Elbasan)
Vëzhgues: E.Meçe (Vlorë)
Kartona të verdhë: Gjoni, Canka/ Shytani, Peqini, Xhika

Burimi: ksbeselidhja.com

Besëlidhja nuk e llogarit humbjen në Lushnjë

2011-10-07T19:10:00.002+02:00

Besëlidhja pretendon të ruajë kreun në stadiumin “Roza Haxhiu”, ku trajneri Kulli pret më të mirën nga të tijtë. Pas fitores minimale në Lezhë me rivalin kryesor, Luftëtarin, një tjetër rival e pret Besëlidhjen nesër, Lushnja, por këtë herë ndeshja luhet në transfertë. Për këtë ekipi lezhjan i ka përqendruar përgatitjet javore për t’u përballur me sukses me kundërshtarin e radhës. Stafi teknik, me në krye trajnerin Ritvan Kulli, ka bërë maksimumin e mundshëm për ta përgatitur ekipin në të gjithë komponentët e lojës së futbollit.

Mungesa e Stojkoviçit Krahas përgatitjes fizike dhe teknike, kujdes të veçantë trajenri Kulli ka treguar në aspektin taktik për ta ndërtuar modulin e lojës sa më efikas dhe në përshtatje me aftësitë e çdo futbollisti, si dhe me lojën e kundërshtarit. Por mungesa e serbit Stojkoviç në qendër të mbrojtjes i ka shkaktuar pak dhimbje koke trajnerit.

Stojkoviç ka plotësuar numrin tre të kartonëve të verdhë dhe për pasojë do të mungojë në Lushnjë. Por trajneri Kulli ka edhe alternativa të tjera, pasi edhe stoli lezhjan ka futbolliste cilësorë dhe që presin të aktivizohen për të treguar vlerat e veta, madje me synimin për të zënë një vend titullari.

Gjykimi i Kullit Megjithëse Besëlidhja luan në transfertë dhe me një rival të drejtpërdrejtë, futbollistët dhe stafi teknik janë të përgatitur për ta përballuar me sukses edhe këtë ndeshje. Për këtë trajneri Kulli thotë : ”Është një ndeshje e vështirë, pasi luajmë me një ekip rival dhe që ka në përbërje lojtarë cilësorë. Mbi të gjitha, Lushnja është një ekip me traditë në futbollin shqiptar dhe që ka pasur dhe ka një emër të mirë e kontribues në cilësinë e futbollit.

Për të gjitha këto ne e respektojmë kundërshtarin realisht dhe ndeshja ka vështirësitë e veta. Ata nuk duhen vlerësuar nga rezultatet e 4 ndeshjeve të para, pasi ekipet ende nuk janë konsoliduar. Edhe ne shkojmë në Lushnjë për të luajtur futboll, për të treguar vlerat tona dhe për të luftuar për rezultat pozitiv.

Ekipi është në gjendje të mirë morale e psikologjike dhe i motivuar maksimalisht për të dhënë më të mirën në fushë. Udhëtojmë për në Lushnjë me autoritetin e kryesuesit të kategorisë së parë dhe për të treguar se e meritojmë këtë vend, por gjithmonë në fushë me lojë korrekte, të bukur e rezultative.

Fatet e ndeshjes do t’i vendosë fusha. Ajo do të tregojë se kush do të gabojë më pak dhe kush do të jetë më efektiv. Shpresoj të jemi ne ata, pasi jemi përgatitur për këtë sfidë. Vërtet thuhet se lushnjarët luajnë mirë me kundërshtarë të fortë, por edhe ne e kemi treguar me vepra se me të fortët luajmë mirë dhe jemi rezultativë,” – përfundon trajneri lezhjan, Kulli.

1 mungesë - Të rëndësishme do të ketë Besëlidhja për ndeshjen e nesërme, që është ajo e mbrojtësit serb, Stojkoviç

1 transfertë - ka luajtur ekipi lezhjan në këto 4 javë të para, atë me Skraparin në javën e dytë, ku është mundur 2-1

Burimi: Sporti Shqiptar